പ്രപഞ്ചത്തിലെ ഒരു ചെറുകഷ്ണമുണ്ടിവിടെ....
വരയും വേലിയും കെട്ടിത്തിരിച്ചത്.
വേരുകളുണ്ടങ്ങോളമിങ്ങോളം,
മുകളിൽ അടർത്തി മാറ്റിയ പച്ചപ്പിന്റെ..
കാറ്റങ്ങോട്ടും, കാറ്റിങ്ങോട്ടും വീശുന്നുണ്ട്,
അനുവാദം പോലും ചോദിക്കാതെ..
ഇവിടുത്തെ വെള്ളം അവിടെ ഊറ്റായിറങ്ങുന്നുണ്ട്,
അശുദ്ധമല്ല പക്ഷെ..
വെടിമരുന്നിന്റെ ഗന്ധമുണ്ടിവിടെ,
അവിടെയും!
സ്ഫോടനങ്ങളിൽ ഉടലിൽ നിന്നും തല വേർപ്പെടുന്നുണ്ടിവിടെ, അവിടെയും!
തോക്കേന്തി നിൽക്കുന്ന സൈനികരുണ്ടിവിടെ, അവിടെയും!
അടിച്ചമർത്തപ്പെടുന്ന ശബ്ദങ്ങളുണ്ടിവിടെ, അവിടെയും!
അസമത്വവും, പാരതന്ത്ര്യവും, പട്ടിണിയുമിണ്ടിവിടെ, അവിടെയും!
സഹോദരങ്ങൾ,
ഇരുവശത്തും സ്നേഹം പങ്കിടുന്നോർ
പ്രണയങ്ങൾ,
ഇരുവശത്തും കൈകോർത്തു പിടിക്കുന്നോർ
പുസ്തകങ്ങൾ,
ഇരുവശത്തും നെഞ്ചോട് ചേർത്തിടുന്നോർ
സംഗീതങ്ങൾ,
ഇരുവശത്തും കാതോർക്കുന്നോർ
തീരുമാനിക്കണം,
ഇതിലേതാണ് ലോകമെന്ന്...
അനുഭവിക്കണം,
വരകൾക്കപ്പുറത്തെ ബന്ധങ്ങൾ...
ജീവിക്കണം,
ഇനിയൊരെണ്ണമില്ലാത്തത് കൊണ്ട്!!
