മനുഷ്യരും രാഷ്ട്രവും

ഈ രാജ്യം നമ്മുടേതാണ്..

ഇവിടെ ജനാധിപത്യമുണ്ട്,

ഇവിടെ രാഷ്ട്രീയമുണ്ട്,

ഇവിടെ സ്നേഹമുണ്ട്,

ഇവിടെ മതേതരത്വമുണ്ട്,

ഇവിടെ നിയമമുണ്ട്...

ജീവിക്കാൻ രേഖകൾ ചോദിക്കുമ്പോഴും

എഴുത്തുകാർ വെടിയേറ്റുമരിക്കുമ്പോഴും

പേരിൽ വിവേചനം കണ്ടെത്തുമ്പോഴും

പ്രതിഷേധത്തിന് ലാത്തി മറുപടി തരുമ്പോഴും

വലുപ്പച്ചെറുപ്പങ്ങളിൽ വിശ്വസിക്കുമ്പോഴും

കൂടെയുള്ളവനെ കൊല്ലാൻ പറയുമ്പോഴും

മനുഷ്യർ തുല്യരല്ലെന്ന് പറയുമ്പോഴും

മതം 'മദ'മാണെന്ന് വിശ്വസിക്കുമ്പോഴും

നിരപരാധികൾ തുറങ്കലിലടയ്ക്കപ്പെടുമ്പോഴും

കള്ളങ്ങൾ പ്രചരിക്കപ്പെടുമ്പോഴും

ജനക്കൂട്ടം തല്ലിക്കൊല്ലുമ്പോഴും

ചോറിൽ ചോര വീഴ്ത്തുമ്പോഴും

വെട്ടിപ്പിടിക്കാനായ് ആക്രാന്തം മൂക്കുമ്പോഴും

കാട് വെട്ടിത്തെളിയ്ക്കുമ്പോഴും

ഭൂമി ഞെരിപിരി കൊള്ളുമ്പോഴും

പക്ഷിമൃഗാധികൾ ചത്തൊടുങ്ങുമ്പോഴും

ജീവികളെ കൂട്ടിലടയ്ക്കുമ്പോഴും

സ്നേഹബന്ധങ്ങൾ നൂൽപൊട്ടി അലയുമ്പോഴും

മനുഷ്യൻ ഈയാംപാറ്റകളെ പോലെ പിടഞ്ഞു വീഴുമ്പോഴും

അവകാശങ്ങൾ മായ്ക്കപ്പെടുമ്പോഴും

വായിച്ചയുടനെ മറക്കുമ്പോഴും...

ഇവിടെ ജനാധിപത്യമുണ്ടോ ?

ഇവിടെ രാഷ്ട്രീയമുണ്ടോ ?

ഇവിടെ സ്നേഹമുണ്ടോ?

ഇവിടെ മതേതരത്വമുണ്ടോ ?

ഇവിടെ നിയമമുണ്ടോ ?

ഈ രാജ്യം നമ്മുടേതാണോ??